|
حان الان موعد اذان النضال وليس هناك فروق في الوقت قدم الدكتور عبد الله حمدوك يوم الاحد 2 يناير استقالته ( المسجلة من قبل كم يوم ) رسميا الى عموم الشعب السوداني في الحضر والبادية. اجتهد حمدوك مشكورا أصاب فيما أصاب واخطأ فيما اخطأ عموما يشكر على مجهوده في بلد منكوب منذ الاستغلال ( أي استغلال بالغين وليس القاف) واجه من خلال معاركه مزاجية الأحزاب وديكتاتورية الافراد داخل الأحزاب والتمسك بالراي ولاعتراض لأجل الاعتراض لتسجيل مواقف وبطولات وعنتريات وهمية يحكيها أصحابها بعد عدد من السنين في بيوت البكيات عن تاريخ نضاله العريض وكيف هو استطاع يفرتق حكومة حمدوك وبعدها ممكن ربنا يكرمه ويكون في برنامج فضائي مثل شاهد على العصر او الذاكرة السياسية او مايشبهها من برامج.
خلونا من المقدمات الطويلة أعلاه ، الان الحصة وطن بدون درس عصر والسؤال الأهم ما ذا نحن فاعلون الان ؟؟ ببساطة من كان يعتقد ان الثورة هي حمدوك فان حمدوك قد رحل مشكورا بعد ان نفذت جميع حيله السياسية ولم يستطع هزيمة العسكر والأحزاب وحده . الان الثورة في الشارع والشوارع لاتخون. المطلوب الان الاتي من المواطنين داخل وخارج السودان :-
1- المواطنين داخل السودان
- عمل مقاطعة اجتماعية لكل الكيزان والعسكر واشعارهم بالعار الكبير ( ما في حاجه اسمها كوز نضيف ومعترض على الحاصل )
- ما في زول يتداول إشاعة في تململ من الجيش وفي نقاش حاد داخل مجلس السيادة واذا في زول قال ليك في معركة داخل القيادة قول ليهو انشالله يتهزموا الاتنين
-اذا في زول قال ليك كتلو عشرين نفر في الموكب قول ليهو الله يرحمهم وانا بنتظر اعلان لجنة الأطباء
-اذا جاك فيديو فيهو زول مصاب إصابة كبيرة ما معناها انه استشهد ممكن عادي يخيطو ليهو الجرح ويمشي يتم الموكب بتاعه زي الترتيب !!!!!!!!!!
- اذا في زول قال ليك الجيش محاوط القيادة وفي هاليكوبتر نزل في القصر وفي طيارة غادرت مطار الخرطوم فيها شخصية مهمة قول ليهو أي عادي بتحصل كل يوم يسافرو بالسلامة
- من الان لو ماجابو ليك صورة برهان بياكل في الكبسة في مطعم شعبي ما تصدق انه سافر السعودية
- ما تكشف مصادرك !!!!! تاني بقول ليكم ما تكشف مصادرك ، لانه المصدر لو اتعرف حيمشو يجيبوهو بكرة الصباح من بيتهم ( عن تجربة حقيقية الكلام ده )
- صدق نصف ما ترى ولا تصدق كل ما تسمع
- لو قالو ليك المدفعية عطبرة جاية تستلم السلطة قول ليهم تصل بالسلامة
- لو ما بتقدر تطلع موكب ما معناها انت زول خايب ساي !!! انت عندك دور تاني ممكن تعملوا يعني ممكن تجيب كمامات ممكن تشارك في التأمين ممكن تساهم بقروشك يا خي ممكن تشيل ليك بوهية وتمشي تكتب في حيطة الكوز الجنب بيتكم هنا يسكن كوز واذا ما بتقدر تعمل ده كله ما تقول للناس طيب البديل منو ؟؟؟؟
- عليك الله ماتقشر بي مصادرك
- لو جاك زول في الحلة بي امجاد او موتر او بوكس قال ليك وين ناس لجان المقاومة في الحلة هنا عشان عاوز اسجل معاهم قول ليهو ما بعرف أي زول من لجان المقاومة ونحن أصلا ما عندنا لجان مقاومة في حلتنا دي !!!! عشان ديل المصادر بتاعين الامن عاوزين يعرفو وين ناس اللجان عشان يقبضو عليهم
- ما تقشر انك في لجان المقاومة وانك ترس كبير والعايزني يجي يقبضني من بيتنا ( الحرب خدعة ياترس خليك صاحي )
- علييييك الله ما تتونس في بيت البكا بي مصادرك
- الناس المصورين في المظاهرات ماتكتبو اسمائكم في الصور
- طبعا ما محتاجين اذكركم انو الامنجية بيكونو متعطلين جنب ستات الشاي ولو جا في حلتكم واحد جديد بتاع تحويل رصيد اعرف طوالي انه ده عنصر رصد ومتابعة
-ماتشتري لستك من بنشر الحلة بتاعتكم الا اذا بتاع البنشر زولك وحبة بندولك وفاتح في شارع مجخنن
- لمن تتصاب لاسمح الله اديهم عنوان بيتك غلط خصوصا اذا لاحظت انه الممرض مصر يعرف اسمك وعنوانك وما تديهو بطاقتك لو جا الجيش زاتو
- علييييك الله ماتقشر لي جكسويتك انك لجان مقاومة وترس كبير
- عنصر الرصد والمتابعة ممكن تكون جكسوية سايقة كورولا مظللة او فيرنا مظلل
2- المواطنين خارج السودان
- المواطنين في أوروبا والأميركتين حاملي الجنسيات ومن يحق لهم التصويت في الانتخابات المحلية والرئاسية الرجاء التوجه الى مسؤول منطقتك ووجه ليهو السؤال الاتي بالعديييييييل :- هل اذا اديتك صوتي في الانتخابات الجاية بتتكلم عن الحاصل في السودان في البرلمان وتتبنى مشروع قرار ؟؟؟؟؟؟ هل من الممكن تساعدنا في ادانة الدعم السريع وتصنيفه كمنظمة إرهابية ؟؟؟؟ لمن تطلب منه ما تطلب كأنك جاي تشحد من ابوهو!!!! أتكلم معاه على أساس انك دافع ضرائب وسيد جلد وراس وياريت لو مشيتو ليهو كمجموعات ومعاكم ادلة بالفيديوهات والصور ( الصورة ابلغ من الف كلمة )
- لازم تشيرو كل الفيديوهات باليوم والتاريخ وأسماء الشهداء وارسال ايميلات لكل المنظمات المعروفة
- لازم الناس تتفق على هاشتاق موحد وتنشروا على اكبر نطاق
- لازم الناس تتبادل العناوين والايميلات لكل المنظمات
- عليكم الله ما عاوزين لايفات كتيرة ومعارك جانبية ومزايدات وطنية ..... عاوزين الفيديوهات تصل لاكبر عدد من الوزراء ونواب البرلمانات في العالم
- اذا وصلك فيديو من صحفي وعاوز تديهو لتلفزيون اجنبي ( التلفزيونات الأجنبية لازم تكتب اسم الصحفي على الفيديو لحفظ الحقوق ) اديهم اسم الصحفي غلط او معكوس او اسم وهمي عشان تحمي الصحفي وما يحصل ليهو زي ما حصل للزميل من وكالة الانباء الأوروبية
3- المتوقع حدوثة الأيام المقبلة
- البرهان حيعلن حكومة جديدة
- البرهان حيجيب ليهو كوز رئيس وزراء
- المواكب حتستمر دون توقف
- الكيزان حيطلعو اشاعات انه برهان وافق على تسليم السلطة بعد تاريخ كذا
- المجتمع الدولي حيمارس ضغط رهيب على البرهان
- حميدتي حيختفي كالمعتاد عشان الناس تقول انه بحضر لانقلاب
- البرهان قد يسلم البشير واحمد هارون للجنائية عشان يكسب شوية تعاطف مع المجتمع الدولي
- قد يتم تنفيذ احكام الإعدام في حق قتلة احمد الخير عشان الناس تهدأ شوية
- حترجع تسعة طويلة بشراسة
- الأحزاب قد تتحالف مع لجان المقاومة
- حتكون في محاولات من الكيزان لشيطنة قوى الحرية والتغيير وافراد لجان المقاومة
- بكرة حيقولو ليك حمدوك ادوهو جواز امريكي وكذا مليون دولار في البنك ...... قول ليهم ربنا يهنيهو يستاهل كل خير يكمل القروش بعرق العافية ( عافيين ليهو )
- البرهان حيحاول يبحث عن كبش فدا يقول انه هو القتل المتظاهرين في الشارع وحيقولو تصرفات فردية
- البرهان حيعلن عن فتح باب الترشح في الانتخابات عشان الشباب يمشوا ينشغلوا بتكوين الاحزاب والندوات ويسيبو الشارع
- حتسمعو اشاعات انه حمدوك يلمح لامكانية رجوعه لمنصب رئيس الوزراء
- السقوط لن يكون قريبا وليس ببعيد برضو
ارجو منكم ارسال هذه الرسالة لاكبر نطاق ممكن
|